ANNE-CATHERINE BECKER-ECHIVARD

No post anterior o prota era a carne e neste pasamos ó peixe: Anne-Catherine Becker-Echivard (está sen nome esta rapaza) é unha artista de orixe franco-alemana que vive en Berlín (que envexa!) e que fai as fotografías que vos amoso hoxe.

O seu traballo visualmente ten a estética que me gusta e ademáis conceptualmente transmite “bo rollo” e moito sentido do humor.

Nas súas fotografías recrea un universo propio con modelos con cabeza de peixe, que desprenden moitísima ternura, e van perfectamente vestidos como as bonecas. É a súa nai quen lle fai os traxes: uniformes, roupas elegantes e tamén de “andar por casa” e é ela quen arma con esmero a escenografía introducíndoos en escenarios de teatro como bares, fábricas, quirófanos… cautivando e fascinando ó espectador.

Cada obra pode levarlle uns tres meses de coidadosa preparación e traballo. Non utiliza a fotografía dixital, preferindo as cámaras tradicionais de película negativa. Unha vez que fotografou a escena, tira as cabezas de pescado ó lixo. Utiliza peixes correntes como sardiñas ou xardas para crear a súa obra.

Os seus peixes imitan ó ser humano nun mundo que sufre certa deshumanización. O resultado son escenas sorprendentes, cheas de alegres cores, detalles e encanto. É canto menos curioso vernos reflectidos en estas escenas cotiás protagonizadas por peixes asexuados que parecen tan vivos e ocupados...

O traballo de esta fotógrafa descubrino hai tempo entre as páxinas dunha revista (teño carpetas cheas de recortes de cousas que me chaman a atención en revistas e xornais, unha variante da síndrome de Dióxenes) e hai uns días volvinme a atopar con unha das súas fotos, así que decidín que o tiña que compartir con vós...